ഞാൻ നിന്നെയൊരു നാളുമനാഥനായി

ഞാൻ നിന്നെയൊരു നാളുമനാഥനായി
വിടുകില്ലെന്നരുളിയ കരുണാനിധേ-എൻ
കരം പിടിച്ചനുദിനം മരുഭൂവിൽ നടത്താമെ-
ന്നുരച്ചവനൊരുനാളും മറക്കുകില്ല

പ്രതികൂലമായിടുന്ന കൊടുംകാറ്റുകൾ
ശക്തിയായെൻ നേരെയടിച്ചുയർന്നീടുമ്പോൾ
മറച്ചുകൊള്ളേണമെ നിൻ ചിറകിൻ കീഴനുദിനം
വഹിച്ചുകൊള്ളുമല്ലോ നിൻ തിരുക്കരത്താൽ;-

ഭക്ഷണപാനീയമില്ലാതലഞ്ഞീടുമ്പോൾ
ശക്തിമാൻമാരുടെ നല്ല ഭോജനമേകും
തൃക്കൈയ്യൊന്നു തുറക്കുമ്പോൾ സർവ്വജീവജാലങ്ങൾക്കും
തൃപ്തിവരുത്തുന്ന പരിപാലകനല്ലോ;-

വെള്ളത്തിൽക്കൂടി നീ തെല്ലും നടന്നീടിലും
മുക്കുകില്ല നദി നിന്നെയൊരു നാളിലും
അഗ്നിശോധനയിൽ കൂടി കടക്കേണ്ടി വന്നാലും
അല്പംപോലും ഭയം നമുക്കിഹത്തിൽവേണ്ട;-

സ്നേഹിതൻമാരെല്ലാം ശത്രുനിരകളിലായ്
അണിനിരന്നനുദിനം പടപൊരുന്നു
പടനായകനായ് നീയെൻ സമീപേയുണ്ടെല്ലാനാളും
വിജയം നിശ്ചയമാണെന്നറിഞ്ഞുകൊൾക;-

മനസ്സാവാചാ കർമ്മണാ അറിയാതുള്ള
ദൂഷണമനവധിയായ് പരത്തുകിലും
ഭംഗമില്ലായെനിക്കെന്‍റെ ജീവിതയാത്രയ്ക്കൊന്നും
ഭാവിയെനോക്കി കണ്ടു പുഞ്ചിരിതൂകും;-

ശത്രു ഭീഷണികൾകേട്ടു മനം കലങ്ങാ
തുണരുക സീയോൻ പുത്രിയാർത്തുഘോഷിക്ക
മണവാളൻ മണിയറയിൽ വന്നിടുവാൻ കാലമായി
ഉടനട നന്നായ് ക്രമീകരിച്ചിടുക;-

നാളിതുവരെ നീയോടിയദ്ധ്വാനിച്ചതും
നഷ്ടമായിപ്പോയിടല്ലേ വീടോടടുത്തു
നിത്യവീട്ടിലെത്താനിനി അല്പദൂരം മാത്രമെയു-
ള്ളാ സമയം പാഴാക്കാതെ ഉണർന്നുകൊൾക;-

എനിക്കായ് കരുതാമെന്നുരച്ചവനെ :എന്ന രീതി