കർത്തനെ വാഴ്ത്തി വാഴ്ത്തി വണങ്ങി

കർത്തനെ വാഴ്ത്തി വാഴ്ത്തി വണങ്ങി
എന്നെന്നേക്കുമവനെ സ്തുതിച്ചീടുവീൻ

അവൻ നല്ലവനല്ലോ ദയ എന്നുമുള്ളത്
സ്തോത്രഗീതം പാടി പുകഴ്ത്തുവിൻ രാജരാജനെ
ഏകനായ് മഹാത്ഭുതങ്ങൾ ചെയ്തിടുന്നോനെ;-

ചെങ്കടൽ പിളർന്നു നല്ല തുവർനിലമാക്കി
ശങ്കയെന്യേ തൻ ജനത്തെ നടത്തിയോനെ
മിസ്രയീം സൈന്യത്തെ ന്യായം വിധിച്ചവനെ;-

തീക്കൽ പാറയതിൽനിന്നും ഇസ്രായേലിന്
വാഗ്ദത്തത്തിൻ ജീവജലം കൊടുത്തവനെ
ശക്തന്മാരിൻ ഭോജനത്താൽ പോഷിപ്പിച്ചോനെ;-

താഴ്ചയിൽനിന്നുമുയർത്തിയ ജീവനാഥനെ
വാഴ്ചയേകി സ്വർഗസ്ഥലത്തിരുത്തിയോനെ
വൈരിയിൻമേൽ ജയംതന്ന യേശുരാജനെ;-

അവൻ നല്ലവനെന്നാർത്തുപാടി പുകഴ്ത്തീടുവീൻ
തന്‍റെ സ്നേഹമധുരിമയെന്നും രുചിച്ചിടുവിൻ
ശുദ്ധ കൈകളുയർത്തിപ്പരനെ സ്തുതിപ്പിൻ;-