നിത്യവന്ദനം നിനക്കു സത്യദൈവമേ

നിത്യവന്ദനം നിനക്ക് സത്യദൈവമേ
സ്തോത്രവും ജയവും യോഗ്യം അത്യുന്നതനേ

മർത്യകുലത്തിൻ സൃഷ്ടാവേ നിത്യപിതാവേ
സത്യവിശ്വാസികൾ ചെയ്യും സ്തോത്രം നിനക്കേ

എത്രയോ മനോഹരം നിൻ-കൃത്യങ്ങളെല്ലാം
ചിത്രമതി-ചിത്രമവ-എത്രയോ ശ്രേഷ്ഠം

കെരുബുകൾ മദ്ധ്യേ വസിക്കും സർവ്വശക്തനേ
ഉർവ്വിയെങ്ങും വ്യാപിച്ചീടും നിനക്കെന്നും സ്തോത്രം

മാനവകുലത്തിൻ പാപം മോചനം ചെയ് വാൻ
ഹീനമായ് കുരിശിൽ ശാപം-തീർത്ത പരനെ

നിന്നിൽ വിശ്വസിക്കുന്നവർക്കെന്നേക്കും മോക്ഷം
തന്നരുളാൻ-ഉന്നതത്തിൽ ചേർന്ന പരനേ

സർവ്വ ബഹുമാനം സർവ്വ മഹത്വം സ്തുതിയും
സർവ്വേശ്വരനായ യഹോവയ്ക്കു താൻ-ആമേൻ