എനിക്കിനി ജീവൻ ക്രിസ്തുവത്രേ

എനിക്കിനി ജീവൻ ക്രിസ്തുവത്രേ
മരിക്കിലുമെനിക്കതു ലാഭമത്രേ

മനമേ യേശു മതി
ദിനവും തൻചരണം ഗതി

പലവിധ ശോധന നേരിടുകിൽ ­ഇനി
മലപോൽ തിരനിരയുയർന്നിടുകിൽ
കലങ്ങുകയില്ല ഞാനവനരികിൽ
അലകളിൻ മീതെ വന്നിടുകിൽ;- മനമേ..

ഇരിക്കുകിൽ തൻ വയലിൽ പരിശ്രമിക്കും­ഞാൻ
മരിക്കുകിൽ തന്നരികിൽ വിശ്രമിക്കും
ഒരിക്കലുമൊന്നിനും ഭാരമില്ലാതിരിക്കുമെൻ
ഭാഗ്യത്തിനിണയില്ല;- മനമേ..

പരത്തിലാണെന്നുടെ പൗരത്വം­ഇനി
വരുമവിടന്നെൻ പ്രാണപ്രിയൻ
മൺമയമാമെന്നുടലന്നു
വിൺമയമാം, എൻ വിന തീരും;- മനമേ..