നീയല്ലോ എനിക്കു സഹായി നീയെൻ പക്ഷംമതി

നീയല്ലോ എനിക്കു സഹായി
നീയെൻ പക്ഷംമതി നിന്‍റെ കൃപ മതി
നീയല്ലോ എനിക്കു സഹായി

അൻപിനാലെന്നെ വീണ്ടുകൊള്ളുവാൻ
തുമ്പങ്ങൾ സഹിച്ചല്ലോ-എന്നെയും
ഇമ്പ കനാൻ ചേർക്കുവാനായ്
സ്വന്തരക്തം ചിന്തി നീ…ആ…ആ…

നിന്നെ കണ്ട നാളതു മുതൽ
ഇന്നീ ദിനം വരെയും-എനിക്കു
നന്മയെന്യേ തിന്മയൊന്നും
ചെയ്തതില്ല ചിന്തിക്കിൽ…ആ…ആ…

ഇല്ല ഇതുപോൽ കണ്ടതില്ല ഞാൻ
തില്ല്യമില്ലാ സഖിയെ-മനസ്സിൽ
എല്ലാനാളും ധ്യാനിക്കുകിൽ
അല്ലൽ മാറിപ്പോകുമേ…ആ…ആ…

എന്‍റെ ദു:ഖം എല്ലാം തീർക്കും
എൻ കണ്ണീർ തുടയ്ക്കും-ഇനിമേൽ
ഇന്നുമെന്നും കൂടെയിരിക്കും
എന്ന വാക്കുതന്നല്ലോ…ആ…ആ…

ഘോരമാം പരുക്കിനാൽ ഞാൻ പാരം
ദുഃഖിച്ചീടിലും-എന്നെയും
ചാരെ ചേർത്തു രോഗക്കിടക്ക
മാറ്റി-വിരിച്ചിടുമേ…ആ…ആ…

സ്നേഹിതരെന്നെ പരിഹസിച്ചു
സാഹസം ചെയ്കിലും-സർവ്വവും
മൗനമായ് സഹിപ്പതിനു മനസ്സു
തന്നിടുന്നോനെ…ആ…ആ…