ഞാനും എനിക്കുള്ള സർവ്വസ്വവും

ഞാനും എനിക്കുള്ള സർവ്വസ്വവും
ദൈവത്തിൻ ദാനമെന്നോർത്തീടും ഞാൻ
ഞാനും കുടുംബവും സേവിച്ചീടും
യാഹെന്ന ദൈവത്തെ ഇന്നുമെന്നും

എൻ ഗേഹം ദൈവത്തിൻ വാസസ്ഥലം
ആരാധിച്ചിടുമാ ധന്യനാമം
അർപ്പിച്ചിടും എൻ സമസ്തവും
സ്തോത്രത്തിൻ യാഗങ്ങളാൽ;- ഞാനും…

സന്തോഷ സന്താപ വേളകളിൽ
ഒന്നായണയും തൻ സന്നിധിയിൽ
സ്നേഹിച്ചിടും ക്ഷമിച്ചിടും
കരുതീടും തമ്മിൽ തമ്മിൽ;- ഞാനും…

നാഥൻ എനിക്കേകിടും ദാനമെല്ലാം
സ്നേഹത്തിൽ ഏവർക്കും പങ്കുവയ്ക്കും
ദുഃഖിതർക്കും പീഡിതർക്കും
ആവോളം നന്മചെയ്യും;- ഞാനും…

എന്നിൽ നിയുക്തമാം ദൈവയിഷ്ടം
ആരാഞ്ഞറിഞ്ഞു ഞാൻ ജീവിച്ചിടും
സത്യ-ധർമ്മ-നീതി-മാർഗ്ഗം
നിത്യവും പിന്തുടരും;- ഞാനും…