കാണുന്നു ഞാനെന്‍റെ വിശ്വാസ കൺകളാൽ

കാണുന്നു ഞാനെന്‍റെ വിശ്വാസ കൺകളാൽ
മോഹനമേറുന്ന ശോഭിത പട്ടണം
കേൾക്കുന്നു ഞാനെന്‍റെ നാട്ടിലെ ഘോഷങ്ങൾ
വീണകൾ മീട്ടുന്ന ദൂതരിൻ മോദങ്ങൾ

ആനന്ദമേ പരമാനന്ദമേ അതു
ശാലേംപുരേ വാസം ആനന്ദമേ

ശോഭനമേ അതു ആരാൽ വർണ്ണിച്ചിടാം
സാമ്യമകന്നൊരു വാഗ്ദത്ത നാടിനെ
പൂർവ്വ പിതാക്കളവിടെയെത്തീടുവാൻ
ലാഭമതൊക്കെയും ഛേദമെന്നെണ്ണി ഹാ!;- ആനന്ദ…

കണ്ണിമയ്ക്കും നേരത്തിന്നുള്ളിൽ ഞാനിതാ
കണ്ണുനീരില്ലാത്ത നാടതിലെത്തിടും
വിണ്ണിൻ വിഹായസ്സിൽ പാടിപ്പറന്നു ഞാൻ
വാഴ്ത്തിടും പ്രിയനെ നിത്യ നിത്യായുഗം;- ആനന്ദ…

ഒന്നുമെനിക്കിനി വേണ്ടാ ഈ പാരിതിൽ
അന്നന്നുള്ളാവശ്യം കർത്തൻ നടത്തുമ്പോൾ
ലോക മഹത്വങ്ങൾ ചപ്പും ചവറുമെ
യാത്രക്കതൊന്നും സഹായമല്ലേതുമേ;- ആനന്ദ…