പോകാമിനി നമുക്കു പോകാമിനി

പോകാമിനി നമുക്കു പോകാമിനി
കുഞ്ഞാട്ടിൻ പിന്നാലെ പോകാമിനി
പോകാമിനി നമുക്കു കുഞ്ഞാട്ടിൻ പിന്നാലെ
പാടാം നവീന സംഗീതങ്ങളാർപ്പോടെ

നാടില്ലാ വീടില്ലാ കൂടുമില്ല
കൂടെ വരാനേറെയാളുമില്ല
മോടിയുള്ള വസ്ത്രം മേനിമേൽ ചുറ്റുവാൻ
ഏനമില്ലെങ്കിലുമാനന്ദമേ നമുക്കു;-

കഷ്ടതയാകുന്ന നൽവരത്തെ
അപ്പൻ നമുക്കായിങ്ങേകിയല്ലോ
തൃക്കയ്യാൽ വാഴ്ത്തിത്തരുന്ന പാനപാത്രം
ഒക്കെ കുടിച്ചു നാം അക്കരെ പോകണം;-

കുഞ്ഞാടിനെയെങ്ങും പിൻതുടരാം
കന്യകമാരാകും നാമേകരും
കുന്നുമലകളും വന്യമൃഗങ്ങളും
ഒന്നും കണ്ടാരുമേ പിൻവാങ്ങിപ്പോകല്ലെ;-

കല്ലുണ്ടു മുള്ളുണ്ടു കാഠിന്യമാം
ഭള്ളും സഹിക്കണം നാമിനിയും
ഉച്ചവെളിച്ചത്തു കൊള്ളചെയ്തിടുന്ന
കള്ളസഹോദരരുള്ളതിനാൽ വേഗം;-