സർവ്വ ലോകവും സൃഷ്ടി ജാലവും

സർവ്വ ലോകവും സൃഷ്ടി ജാലവും
സർവ്വദാ വാഴ്ത്തും സ്നേഹരൂപനാം
സത്യ ദൈവത്തിൻ ഏക നിത്യപുത്രനാം
ക്രിസ്തുയേശുവെൻ രക്ഷാദായകൻ

ഞാൻ വിശ്വസിക്കുന്നു
ഞാൻ ആരാധിക്കുന്നു
ഞാൻ ആശ്രയിക്കന്നു
എൻ രക്ഷിതാവിങ്കൽ

സമൃദ്ധമാം ജീവനെന്നിൽ പകർന്നീടുവാൻ
ഉയിർ തന്നു വീണ്ടെടുത്തു തിരുസ്നേഹത്താൽ
എന്‍റെ പാപശാപമെല്ലാം താൻ വഹിച്ചതാൽ
തന്നടിപ്പിണരെനിക്കു സൗഖ്യദായകം;- ഞാൻ…

യേശുവല്ലാതില്ലിഹത്തിൽ ആത്മരക്ഷകൻ
നീതിയിൻ കൃപാസനത്തിലേക മദ്ധ്യസ്ഥൻ
നിത്യ ജീവദായകനാം സത്യമാർഗ്ഗം താൻ
കുഞ്ഞാടുകൾക്ക് സ്നേഹമേകും നല്ലിടയൻ താൻ;- ഞാൻ…

ശാശ്വതമാം തൻകൃപയിൽ ആനന്ദിക്കും ഞാൻ
രക്ഷയേകും ദിവ്യപാത പിൻതുടരും ഞാൻ
ജ്ഞാനമേകും തൻ വചനം അനുസരിക്കും ഞാൻ
ശ്രേഷ്ഠമാം തൻ മാതൃകകൾ അനുസരിക്കും ഞാൻ;- ഞാൻ…